|
آرچا
|
||
|
ادبی ، بديعي و اجتماعي |
ساعات ایشله ییر:
تیق - تیق، تیق - تیق
بالتالانیر عؤمروم
بالتالانیر بیر چینار کیمی
دیقه لر قوپور عؤمرومدن
قوپور قیریق - قیریق
تیق - تیق، تیق - تیق: ایشله ییر ساعات
یاشاییریق سس سیز، سمیرسیز
ایتیریریک دوستو، تانیشی
ایتیریرین یاشادیقجا بیز
پییله نیر گؤوده میز
روحوموز جیریق - جیریق
تیق - تیق، تیق - تیق: ایشله ییر ساعات
او واخت دا ایشله ییردی ساعات
من اوشاق اولاندا
آتام اوشاق اولاندا
بابام اوشاق اولاندا
سیغین آلبوما
سیغین شکیله.
آخسین خاطیره لر
آخسین اوزونه گیله - گیله،
ایلیق - ایلیق
تیق - تیق، تیق - تیق: ایشله ییر ساعات
گؤیه ریر بوز دوداقلاری سویون
اوشویور دام - دیوار
اوشویور، اوشودوکجا قار
هاردادیر باهار؟
هانی زیغ - زیمیریق؟
تیق - تیق، تیق - تیق: ایشله ییر ساعات
یئریشیگی یورغادی
بوغدا یئمز قارغالار
اؤزون به تر ییرغالار
یومورتلایار قوش کیمی
بانلاماز بایقوش کیمی
قورباغانین قارغایا
دخلی یوخدور آی قاغا!
من گئتمه دیم
الینده قالسین دئیه
سن دئمه
گئدیبمیش هامی!
***
صداقت بؤلوردو تانری
وار - یوخوم بوغچادا تله سدیم.
منه ده چاتسین دئیه
گئتمه میشدی هئچ کیم!
***
زامان فاجعه بسله ییر قوینوندا
انسان معجزه اومور اوندان
من سنسیزلیگه دؤزورم
سن وفاسیزلیغا اتهام ائدیرسن منی!
تهران ۱۳۷۱
شیمشه یین تؤرتدیگی عکس صدا،
قورخولو دالغا،
هامینین آنا دیلی!
قلبین گؤزو،
اوره یین دئییلمه میش سؤزو-
اوره یین اؤزو!
چاتما قاشلارین سئوداسی،
کیپریکلرین غوغاسی،
یاناغین چالاری،
حیاتین اصل معناسی!
آیلی - اولدوزلو سماداکی انگین لیک،
اوفوق آشیریمیندا گؤرسه نن آغ آتلی،
وارلیقداکی زنگین لیک!
قادین سسینده کی ملاحت،
دونیادا ان بؤیوک حقیقت،
عوزئییر به ی، عاشیق عدالت!
بئیین جیغیرلاری نین یولچوسو،
حاققین یانیلماز اؤلچوسو،
قاچیش یاریشیندا آتاسینا غالب گلن اوشاغین سئوینجی،
آنا قوجاغیندا مورگوله ین کؤرپه نین آرخایین لیغی،
مله شن قوزولارین اضطرابی، نگرانلیغی!
اردبیل اوفوقونون پارلاق سحری.
ایتیگین تاپیلماسی،
بایرام سئوینجی، یاس کدری!
ارک قالاسیندان شهر اوزه رینه یاغان آتشین سؤزلر،
داغلارداکی دؤیوشلر.
اربیلدن بورازجانا اوزانان اوتوز ایکی ایللیک یول،
داغلارداکی دؤیوشلر،
بولاق باشینداکی گؤروشلر.
قادین سسینده کی ملاحت،
دونیادا ان بؤیوک حقیقت،
عوزئییر به ی، عاشیق عدالت!
اؤلومو لغو ائدن قووه،
آغ بوخاقداکی قارا خال،
قیغاجی باخیشداکی قیغیلجیم،
یارا یازیلان عرض حال!
قادین سسینده کی ملاحت،
دونیادا ان بؤیوک حقیقت،
عوزئییر به ی، عاشیق عدالت!
تهران، ۱/۸/۱۳۷۹
نه یازیق اولدو تالیشلار!
تنها قالدی گور یاغیشلار!
حؤوصله سی گلمدی تورایغالارین!
نه اولسون کی،
یئردن چیخان سویا بولاق دئدیک!
قالاقلانمیش قایالارا داغ دئدیک!
قوروماسا دا، آخماز آراز!
نه فرقی وار آغجاقانادلا کپه نه یین؟!
قلبنده گونش دوغولدو،
قلبینده گونش بوغولدو!
اولدوزلار ییه سیز قالدی!
یومولدو گؤزلر.
هوپدو تورپاغا خاطیره لر!
سیلیندی هر شئی!
***
باهار!
دویغولو شیمشکلر چاخیر گؤی اوزه رینده.
چایلار آخیر.
یول آلیب گئدیر دنیزه دوغرو.
تالا بولودلار آلتیندان بیج - بیج باخیر گونش.
یئنه اؤز اوربیتینده فیرلانیر قوجا پلانئت.
یئنه گؤزلری گولور مکتوب آلان قیزین.
داوام ائدیر ماجراسی،
ایلانلا یارپیزین.
نه وار کی،،،!!!
چتیندیر دونیانی آنلاماق.
اردبیل، ۱۹/۶/۱۳۸۱، گئجه ساعات ۳۰/۱۰
اولدوزدئدی: کیمینکی؟
دنیز دئدی بیزیمکی!
اولدوز دئدی: اوچ و دؤرد
دنیز دئدی: گلن وار!
اولدوز دئدی: قاپینی اؤرت!
دنیز دئدی بئش، آلتی
اولدوز دئدی: بس بو نه؟
دنیز دئدی: داش آلتی!
اولدوز دئدی: یئددی دئه،
سونرا دؤنوب دئه سککیز.
دنیز دئدی: قیرخ سککیز.
اولدوز دئدی: دوققوز، اون.
دنیز دؤنوب اودقوندو!
اولدوز دئدی: گوللو دون!
اولدوز دئدی: دنیز، دئه.
دنیز دئدی: اولدوز، دئه.
هر ایکیسی گولدولر
دئدیکلرین بیلدیلر:
بیر، ایکی، بیزیمکی
اوچ، دؤرد، قاپینی اؤرت
بئش، آلتی، داش آلتی
یئددی، سککیز، قیرخ سککیز
دوققوز، اون، گوللو دون.
کؤمورچو قارداشا و عادتا جانا گلمیشه و اودئی نیارادا اوجاقچی یا و بیرده هامینیزین عمیزه میرزه علی اکبر صابردن بیر هدیه:
نولور شیرین مذاق ائتسه منی حلوای حریت
یئسم بیل لقمه اوندان سؤیلهسم اوخقای حریت!
دی خیر اولسون، یوخو گؤردوم کی، بیر دریا کناریندا
تؤکوبلر یان با یان، قات – قات، بوتون لای – لای حریت.
ییغیب دا دولدورورلار کیسه – کیسه، باغلانیر مؤحکم
وورورلار تلله داغدان دا آشیر بالای حریت
زبس چوخدان بری شؤقونده ایدیم من بو حلوانین
دئدیم یاران، نولور وئرسز منه بیر پای حریت!
سؤزوم خوش گلمه ییب تحویلداره سؤیله دی «گم شو،
بدست کوته از نخلی مجو خرمای حریت.
نمیدانی که این دلبر بو گون مخصوص ایران است
توخود نامحرمی بر شاهد زیبای حریت»
کمال یاس ایله محروم اولوب بیر یاندا اگلشدیم.
آلیب بیر کشتیه دولدوردولار تای – تای حریت.
سویستوک قیشقیریب کشتی روان اولدو باخیردیم من
هله گئتمکده ایدی زورق دریای حریت.
کی ناگه بیر قارا بایراق آچیلدی دور[1] آغاجیندا
یازیلمیش اوندا بیر خط مصیبت زای حریت.
اوخورکن خطی معلوم اولدو کشتیبانی غرق اولموش
قالیب دریاده حیران کشتی دعوای حریت.
خروشان موجلار هر سمتدن یکسر هجوم آور
گؤروب امواجی کشتی دن اوجالدی: وای حریت
بو سسدن سکسه نیب دوردوم، گتیردیم ساعته باخدیم
هله گؤردوم کی، شبدیر، سؤیله دیم: لالای حریت!
بند اولدوغو شیرین دیل بهانه دیر
بوتون عاشیقلره قوی دئییم بونو
مجنون دیوانه دیر، چؤل بهانه دیر.
بیر دللک تاپیلیر، بیر قویو، درین
بیر چوبان، بیر بولاق، سویو چوخ سرین
سیرری آشکار اولور اسکندرلرین
توتک بهانه دیر، دیل بهانه دیر.
بورولموش یوللاری دوزلتدیک غرض
دمیر چاریق گئییب، دونیالاری گز
وورولان عباسدیر، سئویلن گولگز
قولاج بهانه دیر، قول بهانه دیر.
آیریلیق بیر اوددور یاخیب یاندیریر
دونیانین گئدیشی بیزی قاندیریر
سئوگیسین آغی لا بولبول آندیریر
تیکان بهانه دیر، کول بهانه دیر.
تالانیر وارلیغیم، کسیلیر دیلیم
پولاد ارادمدن سارسیلیر اؤلوم
آپاریر سارانی حاقسیزلیق، ظولوم
چایلار بهانه دیر، سئل بهانه دیر.
بیر ده گؤرورسن کی، ایتیر سوراغی
پوزولور پرگاری، کسیلیر تاغی
بؤیوک بیر اوجاغین سؤنور چیراغی
کولک بهانه دیر یئل بهانهدیر.
غمه مغلوب اولوب آغداشلی یئنه
آچیر اوره یینی گلیب - گئده نه
دئییرلر قوجالیق یاراشیر سنه
آیلار بهانه دیر، ایل بهانه دیر.
بیر نگاه آتشین آشفته حال ائیلر منی
عشق سئوداسینا دوشمک پایمال ائیلر منی
حیرت ای بت صورتین گوردوکده لال ائیلر منی
صورت حالیم گورن صورت خیال ائیلر منی
مووسم عشقه باهار اولماق یوخ آمما نئیله ییم
عندلیب و لاله زار اولماق یوخ آمما نئیله ییم
بیر هئچم عالمده وار اولماق یوخ آمما نئیله ییم
من گدا سن شاهه یار اولماق یوخ آمما نئیله ییم
آرزو سرگشته فکر محال ائیلر منی
سن اولماق
سن اولماق ایستهییرم ...
هر نهده.
«من»ی مندن قوپاریب «سن» ائلهمک ایستهییرم !
بس «من» اولماسا،
اوندا،
آیریلیغا دؤزمهلی اولاجاق «سن»!
یوخ اولاجاق «من»
دونیا،
بیر معناسیز سئودا
بیر ده «من»سیز «سن»!
سن اولماق ایستهمیرم ...
هئچ نهده.
یازیغیم گلیر
سئومهین «من»ه
یالقیز سئودایا
«سن» «من»ین قلبینه حاکیم سنه قول اولدو کؤنول
«سن» عزیزسن «من» اوجوز، بیر هئچم آفت سنسیز
ایلاهی
بیر داش اوسته اوتوروب آرخایین
- آرخاسی گون چیخانا!
زیللهییب گؤزلرین ماوی تاوانا
«دونیا گولوستان اولاجاق،
باشیما دؤولت قوشو قوناجاق» دئییر.
نهیی نه بیلیر گؤرهسن؟
نه دینیر،
نه دانشیر!
نه سولا دؤنور،
نه ساغا آشیر او!
شوبهه ایله قالدیردیغی قیلینج
- ائنمهمیش هاوادا کوتهلیب!
ایلاهی بونون باشینا هاوا گلیب!
بلکه
من تئز دوغولموشام!
یوخسا
دورغونلوق چؤکوب یئر اوزونه
نه دوستوما جان دئیه بیلدیم
نه دوشمهنیمدن حاییفیمی آلدیم
یاشادیم دا قالدیم!
بیر باشی عارسیزلیقدیر دئیه.
ایلاهی!
دونیایا کول الهنیب دئیهسن
هامینین باشینا
هاوا گلیب دئیهسن!
ماتم مارشی
آغآپپاق شوه کیمیدیر قارغا سسیندهکی حزینلیک!
ائلهجه ده،
دیمدیگینده اؤلوم یاشاییر آغ گؤیرچینین!
گونش یاشماغینین ساوالان بویونا حسرتم.
ای ....
هاردادیر قارانلیغین یوخوسونا حارام قاتان _
_ یاریجان نئونلاری دوزلدن کیشی؟
گؤرنلریم ائشیتمیر قولاغیم کیمی!
ائلهجه ده،
قرافیل تمنالی کؤنلوم لهلهییر
_ گرمیج توتان سالخیم سؤیود کیمی.
گناهدیر دیلیمه بیر دئمک
تانریا ایکی دئمک کیمی!
ائلهجه ده،
چتیندیر قانماق قانماماق قدر!
ای ....
«سیچان سیدیگینین دنیزه خیری وار» دئین!
_ سؤندورمدی نمرود اودونو قورباغانین داشیدیغی سو!
سؤزلر،
چایلاق داشی تک سوروشور مصراعلاریمدان،
_ سوزولمور کاغیذا قلبیمین آجیسی!
ائلهجه ده،
گونش غربدن دوغور دئییرلر!
هله گرنهشیر زامان
هله اسنهشیر انسان
یوخوم گلیر.
تهران 15/7/1378
لاقید قالا بیلمیرم
یوخوشو چیخان آیاقلار کیمی
دیرماشیر مصراعلارا یورغون سؤزلریم.
گؤیه اوجالان اللره،
گؤیه دیکیلن گؤزلره،
یوخسا هر شئی دوزهلر دئییم؟
الیم جیبیمه گئدیر.
اودورام توستونو یایلاق هاواسی تک!
بلکه هر شئی دوزهلر دئییم؟
همدمیم اؤزومم بیر ده سیقارئت
دوشونورم یئنه
فقط دئیه بیلسئیدیم
«منه نه؟»
داشناکستون
انسان طالعینین آلین یاراسی
پاییز فصلینین آغیز – بورونو
سیچان قاراسی.
عیاشلارین گؤزوندهکی بیج گولوش
فیریلداقچیلارین ییغینجاغی
اؤلو اوزونو یویان مردهشیر
ابلیسلر اوجاغی.
آغریماز باشا ساریلمیش دستمال
چاغیریلمامیش قوناق
دلینین قویویا آتدیغی داش
یوردیئری آختاران سومسوک ایت
کورکه داراشمیش بیره
آخماق الیندهکی کیبریت.
آیریلیق
ای!
دایان!
گؤرهسن ندیر،
قوپوزون باغرینی یاران __
__ او ناله، او هارای؟
بلکه،
گوندوزلر گؤز یومان،
گئجهلر یاتان وار کوچهده!
یوخسا،
ساغ آیاغینی آتان وار کوچهده!
ائشیتمزسن
سنه دهین گوللهنین سسینی!
آه .....
فقط بیر دیقه یوبانسا،
بیر قارینج یانلسا،
دونوب، یئریندهجه قالسایدی او مرمی!
ای!
دایان!
«هاردان»ی «هارا»یا جالایان
گلسن ده هارادان
گئتسن ده هارا
یولچو دئمهرم میسسیا داشیمایانا.
ای!
هارداسان؟
شربتدن امتناع ائدن
آغینی باشینا چکن
«جهنم بهشتین ان گؤزل نؤقطهسیدیر»
دئین کیشی!
باتان بیر اولدوزا چیخدی بیر اودوز!
آنا اولدو باجی
آنا اولدو قیز
حقیقت سیخدی کؤنلومو
عادیلشمهدی بیرجه
آنا اؤلومو
باجی اؤلومو.
یئیجه، 9/2/1389
غزل
ایهاالناس! گلین صفحه قرآنه باخین
دئیهسن مهدی بو، یا آیت یزدان گؤرونور
بتپرستلر نه بیلیر شهد شکر شؤوقو ندیر؟
چشم و ابروده __ باخین __ مهبط ایمان گؤرونور!
حکم «یحیی» و «یحیی»دی، «یمیت»ه یئر یوخ
لایزال آیهسیدیر چشمه حیوان گؤرونور
بو، گلستان ارمدیر دئیهسن، یوخ مثلی
چونکی بو وادیده هر ذره غزلخوان گؤرونور
نظر لطف ائله آغداشلی دوروبدور قاپیدا
الی قوینوندادی کیم آرچایا مهمان گؤرونور.
الوداع
گئدهجهیم بورادان
صبحون قوناغی
آخشامین مئهی کیمی.
ماوی لکهیه دؤنهجک منسیزلیک
آنالارین قبیری
لالهلرین سئهی کیمی.
دولاجاق گؤزلرین باهار بولودو تک!
یاغاجاقسان سسسیز – سمیرسیز،
پاییز یاغیشی کیمی.
باخ!
بئله باشلاناجاق
خوخانلارین تویو – دویونو
دویونلره پیلهین قابانین سئوینجی!
منی دیندیر
یئر کورهسیندن آغیردیر
تیسباغانین داشیدیغی یوک
جهنم اودوندان ایتیدیر
یانان داخمانین آلووو
بوغولماق ایستهییر
گؤزلرینین بولاغیندا
عمان حسرتینده یانان کؤنلوم
دوغولماق ایستهییر
گؤزلرینین بهبهیینده
یئنی دونیانی او گؤزلرله آنان کؤنلوم
آرزولارا گؤز یوموممو؟
قولاغیما آخان سسلری گؤرمهدن؟
نه تیسباغا اؤز یوکون آتار
نه داخمانین آلووو سریندیر!
بیرجه
سن منی دیندیر،
عزیزیم!
شاعیر دوشونجهسی
تانیماق ایستدی قاپیمیزی عزائیل
هله من اوشاق اولاندا
قیزیلجا توتاندا!
«اوغلوم شاعیر اولاجاق» دئدی آنام
قاپینی آچمادی اونا!
نه آنام بیلیردی
نه عزرائیل
نه دهکی، دونیانی یارادان
اؤلدورهجکلر شاعیری بیر زامان
قایتاراجاقلار عزرائیلی
کوسسه ده قاپیئیزدان!
یاغیش یاغیر
قاناد گریر چولپالارین اوزهرینه
جوجه باخیر لهلکلرین آراسیندان
شیغیییر دیمدیگیله
آناسینین پیپیگیندن دامان داملالارا!
تایالارا، دیوارلارا هوپوب سرچه خیلی!
ایت سیلکینیر،
هردن گئدیر آغیر – آغیر.
یاغیش یاغیر:
خیسین – خیسین،
فاغیر – فاغیر.
گئجهلر
دوجاق درهسیندن گونش چیخانا
نئجه ده حسرتله باخیر گئجهلر
سایین گدیگیندن سسسیزجهسینه
اردبیل دوزونه آخیر گئجهلر
بورویوب یئر اوزون ساکیت بیر هارای
گودور کؤرپهلری قایغیکش هومای
گوموش عشوهسیله بدرلنمیش آی
گؤیون اورتاسینا چیخیر گئجهلر
گلین، آی حضرات، توتون بیر خبر
سؤیلهییم باشیما گلیبدیر نهلر
قایماق دوداقلی بیر آلاگؤز دیلبر
کؤنلومو یاندیریب یاخیر گئجهلر
گؤزومون اؤنونده دایانیب بیر سن
خومار باخیشلی، قارا تئل، مینا گردن
قاشلاری دارایان قارا کیپریکدن
آل یاناقلارینا یاغیر گئجهلر
یاغیش تک کؤنلومو سیخیر گئجهلر
25/11/1388
خوش او گونلر کی، سر کویونه دوشموشدو یولوم
بیر ده ناز ائت منه، دیندیر منی قوربانین اولوم
"هجرینه یاندی جانیم"، وصلینه یوخ امکانیم
هجری ده، وصلی ده یارب! هم اؤلومدور، هم اولوم!
|