- جاناوار به ی، سنین به ی لیگینه سؤز یوخدور، امر سنینیکیدیر. بیزیم ده آلاجاغیمیز، وئره جه گیمیز وار. دونیادان شوغل زونبه گئتمه گیمیز یاخشی اولمازدی. اجازه وئرسن گئدک حاقق - حسابیمیزی چورودک گلک.

- اولسون، آمما تئز گلین آ، بورادا سیزی گودورم.

اونلار گئتدی. جاناوار چوخ گوددوکدن سونرا مایوس اولوب گئتدی.

گئتدی، گئتدی. یئتیشدی بیر جامیشا و "جامیش، سنی یئیه جم" - دئدی.

- جاناوار آغا، لیغین ایچینده یاتمیشام، اوست - باشیم باتیقدیر. اجازه وئر دوشوم بو گؤلده یویونوم. چیخیم. سونرا یئه.

جامیش گیردی گؤله چیخمادی. جاناوار مایوس اولوب گئتدی. گئتدی گئتدی، یئتیشدی بیر آتا. "آت، سنی یئیه جم" دئدی.

- جاناوار قاغا، آسلان به یه بیر کاغیذیم وار. کاغیذ آیاغیمین آلتینداکی نالدادیر. اونو دیشلرینله گؤتور، منی یئیندن سونرا آسلانا یئتیررسن.

سونرا آیاغینی قالخیزدی. جاناوار آغزینی اوزاتدی کی، کاغیذی گؤتورسون. آت سونجوق آتیب جاناوارین انگیندن بیر تپیک ووردو. جاناوار یئره سره له نیب، جان وئرمگه باشلادی. تولکو اؤزونو یئتیردی. جاناواردان نه باش وئردیگینی سوروشدو. جاناوار حال قضیه نی دئدی. تولکو دئدی:

- گئتدین گؤردون قویون، یئه قالسین قورو بویون. نئینیرسن اویون - مویون. به یم لوتو اولاجاقسان.

- گئتدین گؤردون قوزو، یئه قالسین قورو دیزی. نئینیرسن دوزنان - موزو. به یم آشباز اولاجاقسان.

- گئتدین گؤردون کئچی، یئه قالسین قورو قیچی. نئینیرسن بئشنن - اوچو. به یم حسابکار اولاجاقسان.

- گئتدین گؤردون جامیش، یئه یانیندا دوموش. یویولموش - یویولمامیش. به یم مرده شیر اولاجاقسان.

- گئتدین گؤردون آت، یئه یانیندا یات. نئینیرسن کاغیذ - بارات. به یم میرزه اولاجاقسان.

تولکونون سؤزو بو یئره یئتیشنده جاناوار تاپشیردی. تولکوباشلادی جاناواری یئمگه. ناغیلیمیز دا بورادا قورتاردی. یئدی ایچی یئره کئچدی. گؤیدن اوچ آلما دوشدو. بیری منینم بیری سیزین بیری ده ناغیلی دئیه نین.