دونن اؤز - اؤزومه فیکیرلشیردیم. شاعیر دوستلاریم یادیما دوشموشدو. ای، نئجه ده گؤزل ایدی او گونلر. شعیر آخشاملاری، اورادا گئدن بحث لر. شعیر نئجه اولمالیدیر؟ جاوانلاری اؤزلرینه چکمک اوچون اونلارین سهولرینه انصافسیزجاسینا گؤز یومانلار دا واردی، اونلارا مسؤل یاناشانلاردا واردی. یادیمدادیر مسؤل یاناشانلاردان بیری "شعیرده تزه لیک" آدلی بیر شعیر ده اوخودو. سون درجه گؤزل ایدی.... هاشیم ترلان! بئله لیکله اونودولماز شاعیریمیز هشیم عمی یادیما دوشدو. اؤزومدن آسیلی اولمایاراق زینال خلیلین بؤیوک فضولیه یازدیغی شعرینین سون بیتینی زومزومه ائله دیم: بیرجه سن یوخسان عزیزیم بیلیر عالم بو گئجه. دئه، نئچین اولمادین ای یار، منه همدم بو گئجه.

سونرا هشیم عمی نین دونیاسینا دالدیم: آذربایجان دئییلنده دونیا منه کیچیک گلیر....

آرشیوه سیغیندیم. گؤرون نه یازمیشدی:

آلوولو سالاملار ممی زاده یه

وفای عهد ائتدیم سنین سؤزونله

دسته گول باغلادیم شعریمدن

گؤندردیم، نشر اولسا گتیر اؤزونله.

من ده اونون سالامینی جوابسیز قویمادیم:

آلقیش وفاسینا شاعیر دوستومون

منه گؤندردیگی چلنگه آلقیش

چاغیرما تئهرانا، گل اردبیله

بیر دردیمی اؤیرن، کئفیمی سوروش

غربتده غریبلیک چکمه یه نه وار!

آغیردیر وطنده غریب یاشاماق

گؤرنده بئینیمدن دومانلار قوپار

اردبیل تک یئرده فارسی دانیشماق

وبلاق اوخوجولارینی هشیم عمینین منه گؤندردیگی گول دسته سیله تانیش ائدیرم:

دونیا منه کیچیک گلیر

کایناتی وئرین منه،

دونیا منه کیچیک گلیر

گئرچکلیگی دوشوندوکجه

رؤیا منه کیچیک گلیر

چیگنیمده کی عؤمرون بارین

دالدا قویدوم نارین - نارین

غواصی یام عمانلارین

دریا منه کیچیک گلیر

شعری، سؤزو داشدان کئچن

هر دوزو اگری دن سئچن

شعریتی اؤلچوب، بیچن

گونیا منه کیچیک گلیر

عؤمرون سورر یاندیقجا شام

او یاندیقجا من ده خوشام

گؤردویومه اینانمیشام

خولیا منه کیچیک گلیر

اونون فعلینده وار کلک

هئی الندیک الک - الک

میدانیما دونیا گرک

صحرا منه کیچیک گلیر

لئیسان اولوب یئره ائنسم

دالغالانیب لپه لنسم

قایالارا سپه لنسم

قایا منه کیچیک گلیر

خئییر کیمیا، -- شر بو آندا

باش قیمته ساتیلاندا

میس قیزیلا قاتیلاندا

کیمیا منه کیچیک گلیر

اؤنونده هر سؤزون من ده

عار بیلمیشم اگیلنده

آذربایجان دئییلنده

دونیا منه کیچیک گلیر